“Yaşıl dünya naminə həmrəylik ili” çərçivəsində növbəti ağacəkmə aksiyası keçirilib

Mən istəyirəm ki, hamınız təbiəti qoruyanlar olasınız
Heydər Əliyev

Dünya Azərbaycanlılarının Həmrəyliyi Günü ərəfəsində Azərbaycan Respublikası Səhiyyə Nazirliyi akademik M.A. Topçubaşov adına Elmi Cərrahiyyə Mərkəzi (ECM) və Yasamal rayon İcra Hakimiyyətinin təşkilatçılığı ilə “Yaşıl dünya naminə həmrəylik ili”nə həsr olunan növbəti ağacəkmə aksiyası keçirilib.  Bu tədbirlər ekologiyanın qorunması, ətraf mühitin sağlamlaşdırılması və cəmiyyətin ekoloji şüurunun artırılması məqsədi ilə təşkil olunur. Adıçəkilən aksiya ətraf mühitin qorunması ilə yanaşı, həm də əhalinin sağlamlığını yaxşılaşdırmağa xidmət edir.

Ağacəkmə aksiyası həm səhiyyə sektorunun ekoloji məsələlərdəki rolunu vurğulamaq, həm də ümumi maarifləndirməni artırmaq üçün böyük əhəmiyyət kəsb edir. ECM bu təşəbbüslərdə mütəmadi və aktiv iştirakı nümunəvi bir yanaşmadır. Ağacəkmə aksiyaları təbiətin qorunması və ekoloji problemlərin həlli üçün son dərəcə vacibdir.

Tədbir ECM-in direktoru professor Rauf Ağayevin, direktor müavinləri – tibb elmləri doktoru İlham Kazımov, Anar Ağayev, elmi katib tibb üzrə fəlsəfə doktoru Turan Kərimova, şöbə müdirləri, əməkdaşları və Yasamal Rayon İcra Hakimiyyətinin əməkdaşlarının  iştirakı ilə keçirilib.

Tədbiri giriş sözü ilə açan ECM-in direktoru R.Ağayev bildirib ki, ECM-in həyətində ağacəkmə aksiyasını həyata keçirməyimizin çox vacib və dərin mənası var. Ağac əkmək yalnız təbiətə töhfə vermək deyil, eyni zamanda insan həyatına, sağlamlığa və gələcək nəsillərə olan qayğının göstəricisidir. ECM insan sağlamlığını qorumaq və yaxşılaşdırmaq missiyasını daşıyır. Ağaclar da bu missiyaya öz töhfəsini verir. Onlar yalnız havanı təmizləmir, həm də xəstələrimizə və personalımıza daha xoş, sakit və rahat bir mühit bəxş edir. Hər bir ağac, ümid və həyatın simvoludur. Onlar bura gələn hər kəsə ruh yüksəkliyi və pozitiv enerji bəxş edir.

“Bu gün əkdiyimiz ağaclar, gələcəkdə böyüyərək müəssisənin həyətyanı ərazisinin gözəlliyini artıracaq, həm də burada müalicə alan insanlara təbiətin sakitləşdirici təsirini hiss etdirəcək. Bununla biz həm də ekologiyanın qorunmasına və cəmiyyətimizə daha yaşıl bir dünya bəxş etməyə töhfə veririk.

Əməkdaşlığımıza və bu təşəbbüsə verdiyiniz dəstəyə görə hər birinizə təşəkkür edirəm. Ümid edirəm ki, bu ənənə davam edəcək və gələcəkdə daha çox belə aksiyalarda bir araya gələcəyik. Gəlin, birlikdə sağlam və yaşıl bir gələcək üçün çalışaq” — deyə direktor vurğulayıb.

Qeyd edək ki, bu gün keçirilən tədbir çərçivəsində ərazidə 400-ə yaxın Eldar şamı əkilib.